Urdinamënt de bibliotech

La bibliotech dla Direzion raionela dla scola ladina de Urtijëi ie metuda adum da doi biblioteches:

-        la bibliotech dla scola elementera tla streda Scurcià n.10 (che se cruzia nce di libri per la scola elementera de Runcadic);

“Cie ie pa liejer?

Ø      Liejer descëida emozions, fej pensé, memorisé y paradlé, svilupé inant pensieres, sburdla a n pensé plu lerch ma nce plu sot y à n gran pëis tl svilup dla personalità.

Ø      Liejer ie na scola dl pensé, ajache per ntënder n scrit muessa la letëura o l letëur savëi da taché adum nfurmazions nueves cun l savëi che la/ël à bele.

Ø      Mutans/mutons che ie tl crëscer muessa mustré artenienza, pazienza y cunzentrazion canche i se dà ju cun n liber.

Ø      L liber nes mët a cunfront cun realtà nia cunesciudes y situazions nueves, nes mustran su deplù manieres de se astilé, y ie perchël  nce n mesun de sozialisazion.

Ø      Liejer ie la miëura maniera de mparé.

Ø      Liejer ie n aiut per l svilup linguistich. Tuedes à desmustrà tlermënter che chiche liej truep à n majer lessich (cunësc plu paroles).

Ø      Da no desmincë: liejer ie bel!

Ø      Liejer gëura i uedli y slergia i ëurijonc, purtan a capì miec i autri.”

(Barbara y Hermann Pitzer – Praxis in der Schulbibliothek)

Tenian cont di pensieres dessëura cunscidrons nosta bibliotech de scola coche luegia da mparé tresora y per si mpurtanza fundamentela da no pensé demez.

Nosta bibliotech de scola se tol dant:

-         de crì ora y cumpré do libri y media nueves - tla cater rujenedes nseniedes - adatei al’età y a cie che l vën nsenià,  che fej ueia de liejer, y libri per maestri per l nseniamënt,. De cataloghisé, nventarisé y njenië ca i libri da pudëi i mpresté ora;

-         de tenì davierta la bibliotech l plu che la va;

-         de ti judè ai maestri a ti fé cunëscer ala sculees/ai sculeies la bibliotech acioche i sebe da se deriejer canche i chir velch;

-         de cunsië chiche chir libri o fej tuedes y dé nfurmazions sun i media da garat.

-         de crì adum libri, fé prejentazions y.n.i. sce i maestri s’l damanda;

-         de mëter a jì manifestazions o proiec che feje crëscer la ueia de liejer;

-         de pité n ambient da se n sté saurì, ulache n va gën a liejer,  y  de mëter ora i libri y autri media che n i tol ca gën.