L muligon tla viëra

Jufa me stufa.
Panicia me sgricia.
Papaciuei ne uei.
Jopa me stropa.
Bales a mi ne me sales.
Fersëiles ie mé per l'ëiles.
Nioch cë da baloch.
Nioches fesc mé la patoches.
Di pësc ne me ncrësc.
Pasta chëla me basta.
Pulënta ie mé per la stënta.
Patac lasci mé te chi sac.
Prata y salata ie na frata.
Carotes y spinot, me da l bot.
Lat dà mé al giat.
Cun café y té ne sei cie fé.
Cun tëurta y pan va me bel plan.
Ciajuel dajons mè ala suricia.
Runi ne ti sà boni a deguni
Crafuncins dan mé ai ujins.
Pëires y mëiles me fej udëi la stëiles.
Crafons da pavé me berdola tl vënter da sainsom nchin japé.
De ribl ne me n jovi tan che n scibl.
Cërn de purcel y craut men muci bën n po suaut.
Pulentina me trascina sun curtina.
Ma canche na drëta fam me gëva tl magon, me sal bën de avëi rujenà mpue da muligon.
Dut zeruch ulëssi gën tré, sce l fossa mé una de chësta spëises da abiné.