Cun na blota festa ie unì stlut jù a Al Plan de Mareo l proiet "Portes", che ova tëut ite tl ann de scola passà n grumon de sculeies de nosta scoles.
L proiet "Portes" se tulova dant de sensibilisé i mutons, i maestri y la families for plu y plu per l argumënt dl'integrazion te scola de mutans y mutons cun bujëns particuleres. L fova unì scrit ora n cuncors, n pudova mandé ite scric che univa pona valutei da na cumiscion. I miëur lëures univa pona nce premiei, vel lëur univa pona ënghe mustrà te n film fat dala RAI de Bulsan.
N dut à 119 sculeies de scoles mesanes y elementeres dla Ladinia mandà ite si lëur. Gran pert de chisc lëures fova scialdi garatà, y la cumiscion (Carla Comploi, Alessandro Dapunt y Luis Mahlknecht) ne à nia abù saurì fé a crì ora propi i miëures. Ma ala fin iel unì pensà de premië diesc lëures, danter chisc nce deplù ora de nosta scola de Urtijëi.Pra la festa via n Mareo à l Ntendënt Dutor Roland Verra abù paroles de lauda per l lëur de ntegrazion che vën fat di per di te nosta scola, lecurdan che n daussa mei se desmincé de chësc aspet scialdi zite ma nce scialdi rich. Nce l assessëur Dutor Florian Mussner à tucà cun si paroles l spirt dla scumenciadiva, jan permez al valor de ntegrazion tla scoles.
Ala fin ie unic premiei i lëures plu garatei. Ora de nosta scola an pudù premië:
Markus Crepaz dla scola elementera de Urtijëi
Florian Walpoth dla scola elementera de Urtijëi
Youcef Kasmi dla scola mesana
Patrick Wanker dla scola mesana
Maddalena Caterisano (che va te na scola auta, ma che fova l ann passà mo sculea dla scola mesana)
Cun gran legrëza à l diretëur Dutor Helmut Senoner pudù ti sëurandé a chisc jëuni n bel pest, plu avisa n bon per cumpré ite libri.
