Intervista cun  Walter Kostner

Co ie pa nasciudes la figures y co es'a abinà i inuemes?
La ie stata nscila: ie son bel da truep ani cun i jëuni, cun i mutons dai diesc ani n su.
Un de chisc mutons che ovi cunesciù, me scrijova unitant. Canche'l ova 15 ani, fov'l ruvà te na cërta crisa, sciche truepsc te chësta età y ël me cuntova de si problems, de chël che ti suzedova.
Ie ulove ti judé, ma savovi che a chëla età ne scoten nia su gën ai cunsëies y ala paroles di plu granc. Perchël ei scumencià a ti fé tei pitli dessënies (ie sé mpue da da dessenië, ajache ove mparà a ziplé) y pona ei nventà doi clown, doi paiazi; n pitl y n grant, che fóssa po stai ël y ie: Gibi y Doppiaw (Doppiaw vën da Walter y Gibi da si inuem).
A chisc doi paiazi ti suzedova de uni sort de pitla stories, che fova chëles che ël me cuntova. Nsci ti pudovi dì velch, dé vel' cunsëi, ti judé.L medemo fajovi cun na muta de 15 ani, che ova perdù si pere y ova ënghe debujën de zachei che ti fóssa daujin, zachei da ti cunté si problems.
Ënghe a ëila ti desseniovi de tel stories. N valgun ani do me à chësta muta dit, che te n mumënt de desperazion, ti ova chisc messages salva la vita.

L message de chisc dessënies?
Ie rate che sce ti cialëis, capiëis debota l message che ue dé inant. A chisc mutons ulovi ti dé cër valores, ma dantaldut l prim valor, che ie per me l amor, l amor per i autri, l amor per la natura, per la vita.

Tan giut adroves'a a fé na storia de Gibi?
N'ëura o doves…aldò che la buta !

Cie fejes'a canche ne dessënies nia?
Lëure bel da truepsc ani per i jëuni y i mutons.
Son mpenià cun i jëuni dl muvimënt Gen, n muvimënt nasciù tl ambient catolich, ispirà al Vangel y perchël daviert y cunesciù ënghe tl'autra gran religions.
L à sciche fin l'unità y la pesc, l crië n mond plu unificà.
I jëuni ie na pert essenziela de chësc proiet y ëi l porta inant cun gran mpëni y entusiasm.

Ulëssi mo ve dì che…
N salut ai mutons dla measana de Urtijëi. Son cuntënt che ve plej Gibi y ve mbince de deventé mpue sciche ël, che sa scuvrì l aspet positiv y bel dla persones y dla cosses y nscila vester plu cuntënt y fé plu cuntënc i autri.

de reviers

inant