Florin ie adum cun Iacun Prugger un di doi campiosi de scioh (Schach). L ie nasciù tl 1990 y da cin ani incà se dal ju cun l „juech di rëiesc", coche l scioh vën tlamà. Florin ie scrit ite tla „Lia Schach Gherdëina", y te chësta lia mperel nce uni lunesc danter la cater y la cinch cun si trainadëur Ruben Bernardi. Oradechël ti plejel fé vel'partita cun si fra canche i à dl'aurela. Sciche Florin nes dij, se damanda l juech dl scioh na gran pazienza, cualità che n mpera a avëi sce n se dà ju plu ala longia cun chësta materia. Tl medemo tëmp mpera i jugadëures nce a pensé do plu avisa y plu sot. Florin à ntenzion de fé pea nce n auter ann pra lia dal scioh, pona ne sal nia coche la jirà inant: l spera che la scola ti lasce mo l tëmp per ti sté do a chësc si hobby. Tl 2002 à Florin venciù un n turnoi dl Jugend Gran Prix, n turnoi provinziel de cualificazion per i campionac taliani. L à bel doi iedesc tëut pert ai campionac taliani de si categoria, l'ann passà al arjont l 45ejimo post.

Cun 1175 ponc ELO arjonjel l 349ejimo post te Südtirol (te chësta tlasifica vën cumpedei pea nce i granc!) Florin fej pert dla scuadra „C" dla Lia dal scioh de Gherdëina che tol pert al campionat provinziel a scuadres y perchël ti muessel suvënz sté permez a jugadëures che ie dassënn plu vedli de ël.

Florin Senoner (12) ist ein begeisterter Schachspieler. Sein bisher größter Erfolg war ein Sieg beim einem Turnier des Südtiroler Grand Prix. Er hat auch schon zweimal an den Italienmeisterschaften teilgenommen.

Florin Senoner è un campione di scacchi che è già riuscito a vincere un torneo della serie Grand Prix dell'Alto Adige. Inoltre ha già partecipato per ben due volte ai campionati italiani di categoria.

www.gardenachess.com