Ribl de furmenton

N adrova:
- 150 g de farina
- 2 ueves
- ¼ de liter de lat
- na preja de sel
- uele da praté

Fé jù na pasta cun la farina, ueves, lat y sel. Mëter mpue de uele te na fana y curì l fonz dla fana cun pasta. Lascé praté l amlet da tramedoi pertes, pona l taië su te pitli toc cun l mueser. La farina de furmenton ie scura y plu grovia, ma dà truepa sustanza y la ie plutosc pesocia, perchël devënta nce l ribl plu grove y dur de chël de farina de selin.
Drët bon da maië leprò ie compot de mëiles o autra versura y sulza.

L furmenton ne ie nia na planta zitia, la ne adrova nia n fonz scialdi rich per crëscer, ma nosc luesc massa alauta ne la lasciova nia plu madurì. Purmpò cujinovi plu dagiut sun nosc mejes scialdi spëisa de furmenton, dala bales, jufa, ribl ala tëurta. Nscì suzedovel che paures da Laion, S.Piere, che ova de biei gran ciamps de furmenton, ma degna pastura per si bestiam, se marciadova ite de lascié vel tier a pastura pra luesc de nosta jënt, contra l paiamënt de 1-2 sté de furmenton da d’autonn.
Cun chësc barat ova nosc antenac l mesun de giamië uni tant la spëisa fata de orde y siëla cun chëscta sort da blava tan rica da sustanzes de gran nutrimënt.