Ich bin mir bewusst - Nëus se rendon cont - A noi la scelta 2011

 

L proiet dla butëiga dl mond

N vënerdi ai 11 y sada ai 12 de nuvëmber mët la butëiga dl mond a jì n proiet ntitulà “Nëus se rendon cont”. L fin dl proiet ie chël de sensiblsé la jënt sun la respunsabltà che n à a tò dezijions tla vita da uni di. L proiet vën nvià via n vënerdi danmesdi canche n valgun sculeies dla scola mesana de Urtijëi sarà tl raion da jì a pe cun lëures realisei nstësc te scola y partirà ora plates de nfurmzion sun l argumënt. Tlo saral nce da udëi fotografies contra la descriminazion realisedes dal “Südtiroler Jugendring” cun l aiut prufescionel de Vito Mirigung y ntituledes “Tu es da ndì”. N vënerdi sëira uniral metù a jì na mëisa turonda ulache l rujenerà esperc dl ambient y plu avisa saral n paur, n hotelier, la diretëura dla scolina y n teologh moral che se dajerà ju cun chësta tematica. Sada sëira unirà mo tenida na santa mëssa che stluj ju chësc proiet.

La scola mesana de Urtijëi fej pea pra chësc proiet cun duta la segonda tlasses

Davia che chësc proiet ie nce adatà per i sculeies dla scola mesana, an -nsci la diretëura dla scola mesana Dut.ssa Maria Kostner- ulù l tò ite tl prugram de furmazion scolastich. N à crì ora de lauré sun l argumënt dl “se rënder cont” cun duta la segonda tlasses y plu avisa à i sculeies pudù se dé ju cun trëi tematiches:

1. La spartizion dl refudam
2. L cunviver nterculturel
3. La produzion de guant lià al marcià rëidl

Se dé ju cun chësta tematiches nes juda a purvé a miuré l mond, nsci la diretëura,  che ie dla minonga che l ie de gran mpurtanza che i sculeies ebe legrëza a fé pea pra n tel proiet y che i l porte nce tla cëses rujenan de chësc te familia.